Gunnar Heiðar skoraði og lagði upp mark í sigri

Gunnar Heiðar Þorvaldsson var maðurinn á bak við 2-1 sigur Fredrikstad á Tromsdalen í norsku b-deildinni í dag en eftir þennan sigur á Fredrikstad enn möguleika á að tryggja sér sæti í úrvalsdeildinni í lokaumferðinni.

Fredrikstad lenti 0-1 undir í leiknum á 52. mínútu en Gunnar Heiðar Þorvaldsson jafnaði leikinn úr víti þremur mínútum síðar. Gunnar Heiðar er búinn að skora 3 mörk í norsku b-deildinni á þessu tímabili. Gunnar Heiðar átti síðan stóran þátt í sigurmarkinu á 63. mínútu þegar Simen Rafn fylgdi á eftir skoti hans.

Fredrikstad er öruggt í umspilið um þriðja og síðasta sætið sem er í boði en tvö efstu liðin fara beint upp. Sogndal er komið upp en Sarpsborg 08 hefur tveggja stiga forskot á Fredrikstad fyrir síðustu umferðina.