Svíar ásælast hlut í Skeljungi

Sænska fyrirtækið Atlantic Tank Storage, dótturfyrirtæki Scandinavian Tank Storage, er á meðal þeirra þriggja sem lagt hafa fram tilboð í 49 prósenta hlut Íslandsbanka í Skeljungi og tengd félög, samkvæmt heimildum Fréttablaðsins. Aðrir sem boðið hafa í hlutinn eru núverandi meirihlutaeigendur, þau Guðmundur Örn Þórðarson, Birgir Þór Bieltvedt og Svanhildur Nanna Vigfúsdóttir, auk Guðbjargar Matthíasdóttur, útgerðarkonu í Vestmannaeyjum.

Tilboð í félagið voru opnuð 21. desember og stefnt á að bindandi tilboð berist í næsta mánuði. Íslandsbanki segir það almenna reglu að gefa ekkert uppi um þá sem bjóða í fyrirtæki í eigu bankans. "Við teljum að það geti fælt fjárfesta frá ferlinu og höfum því ákveðið að gera það ekki. Að sjálfsögðu munum við greina frá því hver eignast þau," segir Halla Sigrún Hjartardóttir, forstöðumaður fyrirtækjaráðgjafar Íslandsbanka.

Eftir því sem næst verður komist hefur Atlantic Tank Storage öðru fremur áhuga á olíustöðinni í Hvalfirði og nýtingu á birgðarými í Reykjavík en ekki áhuga á smásölurekstri Skeljungs. Félagið, sem er með olíustöðina í Hvalfirði á leigu, er talið leita eftir því að tryggja sér aðgengi að henni áfram en markmiðið er að leigja fyrirtækjum aðstöðu hér til að geyma olíu um nokkurra mánaða skeið. Móðurfélag Atlantic Tank Storage rekur birgðageymslur víða á Norðurlöndunum og á meginlandi Evrópu.

Þá er ekki loku fyrir það skotið að uppstokkun verði á eignarhaldi og rekstri Skeljungs í kjölfar sölu Íslandsbanka á félaginu en svo kann að fara að birgðarýmin verði skilin frá rekstrinum verði tilboði Svíanna tekið.

Núverandi eigendur, sem eiga forkaupsrétt að Skeljungi, eru búsettir í Danmörku og er óvíst um fjárhagslega burði þeirra í dag. Birgir rak um tíma pitsustaði Dominos auk þess að eiga fjórðungshlut í Magasin du Nord og í fasteignafélaginu Sjælsø Gruppen ásamt Straumi.