Útflutningsverðmæti aukakvótans hátt í 300 milljónir

Útflutningsverðmæti 460 tonna neyðar- eða aukakvóta, sem sjávarútvegsráðherra ætlar að úthluta til lítilla sjávarbyggða, sem hafa orðið fyrir óvæntu áfalli í atvinnulífinu, nemur á þriðja hundrað milljónum króna.

Úthlutun til ákveðinna staða verður háð því skilyrði að aflanum verði landað og hann unninn á viðkomandi stað. Algengt er að bátar frá ákveðnum stöðum landi annarsstaðar og aflinn sé svo fluttur óunnin þaðan til einhvers þriðja staðar, fjarri heimahöfn. Allt fer eftir því hvar hagstæðast er að landa miðað við veiðislóðina og hvar hagstæðasta verðið fæst fyrir aflann.

Stórútgerðarmenn telja það forsendu fyrir því að útgerðin geti borið sig, svo úthlutunarkerfi neyðarkvótans stangast á við þau sjónarmið. Úthlutun neyðarkvótans er til eins árs í senn þannig að útgerðir geta ekki eignast hann.

Kvótinn er hinsvegar veruleg búbót til þeirra sem fá, því þeir hefðu ella þurft að greiða um 140 milljónir kr. í eins árs leigu fyrir 460 þorskígildistonn. Þorskígildistonn er viðmiðunarhugtak, þannig að það þarf til dæmis hátt í tvö tonn af ufsa upp í eitt þorskígildistonn, þar sem hann er mun ódýrari en þorskurinn.