Segir lánamálum Saxbygg snúið á haus

Framkvæmdarstjóri Saxbygg, Björn Ingi Sveinsson, hefur sent frá sér yfirlýsingu vegna fréttar Fréttablaðsins um dómsmál sem skiptastjóri félagsins hefur höfðað vegna viðskipta félagsins við félög því tengdu.

Í yfirlýsingunni segir Björn Ingi orðrétt: „Ekki er rétt sem skilja má af frétt sem birtist á forsíðu Fréttablaðsins í dag að eigendur Saxbygg hafi lánað sjálfum sér peninga úr sjóðum félagsins. Þarna er verið að snúa málum á haus. Málið snýst um fasteignaverkefni sem Saxbygg átti hlut í ásamt erlendum samstarfsaðilum. Saxbygg var hvergi í meirihluta í þessum verkefnum og það þurfti að verja hagsmuni félagsins ef ástandið á fjármálamörkuðum versnaði. Aðal lándrottinn félagsins var fyllilega meðvitaður um þessar fyrirætlanir strax á fyrri hluta árs 2008 og því er algjör fjarstæða að tala um leynd í þessu sambandi. Um var að ræða björgunaraðgerðir og hefði þrotabú Saxbygg ella orðið fyrir mun meira tjóni.

Þegar íslensku bankarnir hrundu og á einn þeirra voru sett hryðjuverkalög í október 2008 var ljóst að vandræði þeirra gætu orðið til þess að verðgildi þessara eigna myndi hrynja. Því var gripið til þess ráðs að koma þessum erlendu eignum Saxbygg undir stjórn annarra félaga. Var þetta gert í samráði við erlenda meðeigendur sem eðlilega höfðu áhyggjur af stöðu mála á Íslandi. Skiptastjóri hefur verið upplýstur um þessar aðgerðir og aðdraganda þeirra og að fyrirhugað sé að greiðslur komi fyrir eignirnar þegar verkefnunum lýkur - en það er eðli fasteignaþróunarverkefna að afraksturinn af þeim skilar sér við verklok og húsnæðið er selt eða leigt. Áðurnefndar eignir voru seldar að undangengnu ítarlegu verðmati. Skiptastjóri hefur gert athugasemdir við þetta verðmat og er í fullum rétti að gera það og því er óhjákvæmlegt að útkljá þetta fyrir dómstólum.

Undirritaður er sannfærður um að niðurstaðan verði sú að eðlilegt verð hafi fengist fyrir eignirnar. Undirritaður telur raunar að hluti verkefnanna hafi verið of hátt metinn í þessum aðgerðum, miðað við það sem síðar hefur komið í ljós. Í dag er því miður enn óljóst hvort takist að bjarga verkefnunum eður ei."

Þess má geta að þegar Birni Inga var boðið að tjá sig um málið í gær svaraði hann: „Ég hef ekkert um þetta að segja, ekki nokkurn skapaðan hlut."