Töluverður verðbólguótti er meðal fjárfesta

Þetta kemur fram í Markaðsfréttum Íslenskra verðbréfa. Þar segir að þróun Icesave málsins mun hafa sterk áhrif á skuldabréfamarkaðinn næstu vikurnar. Eftir því sem lausn þess máls dregst á langinn mun eftirspurn í verðtryggð bréf verða meiri en í óverðtryggð.

Krónan hefur ekki hreyfst mikið frá áramótum en eftir því sem gengur á núverandi gjaldeyrisforða Seðlabankans mun trú á krónunni minnka og jafnframt geta Seðlabankans til að styðja við hana. Forsenda stöðugs gengis er tryggt aðgengi ríkisins að erlendu fjármagni.

Krónan styrktist lítillega í síðustu viku og lækkaði gengisvísitalan um 0,11% samkvæmt opinberu viðmiðunargengi Seðlabankans og endaði í 234,11 stigum. Krónan styrktist í vikunni um 0,31% á móti evru og hefur verið óbreytt frá áramótum.

Nær engar sveiflur hafa verið á gengi krónunnar frá áramótum, en síðustu vikur fyrir áramót styrkist hún nokkuð. Þessi stöðugleiki vekur nokkra athygli, sér í lagi í ljósi ákvörðunar forseta Íslands að staðfesta ekki hin umdeildu Icesave lög.

Einnig fengu erlendir aðilar greidda vexti um áramót sem þeir gátu selt fyrir erlendan gjaldeyri. Þrátt fyrir þessa staðreynd þá hefur krónan haldist stöðug og geta nokkur atriði skýrt af hverju hún hefur ekki veikst.

Í fyrsta lagi gæti verið að erlendir aðilar eigi tiltölulega lítið af bankainnstæðum á Íslandi. Í öðru lagi að seðlabankinn hafi hleypt þessum viðskiptum framhjá millibankamarkaðinum eða beitt inngripum á honum.



Í þriðja lagi gæti verið að umræddir aðilar vilji halda krónueignum sínum og ávaxta áfram hér á landi en slíkt er þó fremur ólíklegt í ljósi þess hvernig mál hafa þróast, að því er segir í Markaðsfréttunum.