Rooney, Robinson og Ritchie flækt í skattsvikarannsókn

Sjóðurinn sem hér um ræðir er sakaður um að hafa sérhæft sig í að nýta fjárfestingar viðskiptavina sinna á þann veg að viðkomandi borgaði ekki skatt af þeim. Bresk skattayfirvöld standa nú fyrir rannsókn á starfsháttum sjóðsins.

Inside Track sjóðurinn er í eigu fjármálafyrirtækisins Ingenious Media en honum var komið á fót fyrir nokkrum árum þegar ríkisstjórn Gordon Brown samþykkti nýja löggjöf sem fól í sér ýmiskonar skattaafslætti handa þeim sem fjárfestu í breskri kvikmyndagerð.

Samkvæmt frétt um málið í Daily Mail var markmið löggjafarinnar að að auðvelda þeim sem áhuga höfðu á því að fjárfesta í breskum kvikmyndum. Nú óttast margir að þekktir og auðugir einstaklingar hafi nýtt sér löggjöfina til að koma tekjum sínum undan skatti.

Þegar er búið að breyta fyrrgreindri löggjöf á þann hátt að allar skattaívilnanir fara nú til kvikmyndagerðarmanna/fyrirtækja sjálfra en ekki þeirra sem fjárfesta í viðkomandi myndum.

Talsmaður breska skattsins segir að þegar sé búið að loka fyrir skattagötin í löggjöfinni en rannsókn embættisins beinist að því hvort auðugir einstaklingar hafi fyrir þann tíma nýtt sér götin til að komast hjá skattgreiðslum.

Talsmaður Ingenious Media segir að Inside Track sé fjárfestingarsjóður fyrir kvikmyndir en ekki til þess að einstaklingar komist hjá skattgreiðslum. Hann segir sjóðinn ekkert hafa brotið af sér og fagnar rannsókn skattyfirvalda.