Örvænting í New York, Dow Jones í 1000 stiga dýfu

Mikil örvænting greip um sig i kauphöllinni í New York í dag þegar Dow Jones vísitalan tók allt í einu 1010 stiga dýfu rúmlega klukkutíma fyrir lokun markaðarins.

Samkvæmt fréttum í bandrískum fjölmiðlum lækkaði Dow Jones þannig um 8,5% á örskömmum tíma en náði sér á strik aftur undir lokin og endaði daginn í 3,2% falli eða rúmlega 10,500 stigum. Þetta þýðir að dagurinn var sá versti síðan í febrúar á síðsta ári.

Ekki er alveg ljóst hvað gerðist en svo virðist sem villa í sjálfvirku tölvukerfi hjá einum verðbréfamiðlara hafi sett skriðuna af stað. Miðlarinn stimplaði óvart inn söluskipun upp á 16 milljarða dollara í staðinn fyrir 16 milljónir dollara og fjandinn var laus.

Sjálfvirk tölvukerfi á markaðinum eiga að vera með öryggiskerfi sem slær út í tilvikum sem þessum en það gerðist ekki í þessu tilviki.