Greiðsluvilji þrátt fyrir kaupmáttarhrap

Um 12% lántakenda eru með vanskil umfram 60 daga hjá viðskiptabönkunum þremur. Þar af eru um 10,4% sem hafa verið í vanskilum í meira en 90 daga. Þetta kemur fram í skýrslu sérfræðinganefndar Sigurðar Snævars sem fjallaði um skuldavanda heimilanna. Þar kemur líka fram að um 6,4% voru í meira en 90 daga vanskilum hjá Íbúðalánasjóði en um 4% í vanskilum hjá lífeyrissjóðunum. Alls eru þetta um 20% sem eru í verulegum vanskilum.

Gert er ráð fyrir því að kaupmáttur ráðstöfunartekna hafi fallið samtals um fimmtung á þessu ári og síðasta. Þetta kemur fram í skýrslu sérfræðinganefndar sem mat skuldavanda heimilanna. Nefndin skilaði skýrslunni í dag. Í skýrslunni er vitnað í tölur Hagstofu Íslands sem segja að kaupmáttur hafi lækkað um 15,5% í fyrra og spár Seðlabankans gera ráð fyrir að lækkunin nemi um 6,4% á þessu ári.

Fram kemur í skýrslunni að heimilin hafi haldið einkaneyslu með því að draga á uppsafnaðan sparnað og með því að minnka innlán í bönkum og sparisjóðum. Um 40 milljarðar króna hafa séreignasparnaði hafa verið teknir út og innlán heimila í innlánsstofnunum hafa minnkað um 50 milljarða króna á þessu ári.

Í skýrslunni segir að í ljósi mikils kaupmáttarhraps og minni sparnaðar heimilanna blasi þó við að tölur um vanskil vitni um töluvert mikinn greiðsluvilja. Jafnframt sé minnt á margvíslegar aðgerðir sem stjórnvöld og fjármálastofnanir hafi þegar gripið til á síðustu tveimur árum sem vafalítið hafa dreið úr vanskilum.