Lífeyrissjóðsrisar hafa keypt FIH bankann

16. september 2010 19:51

Tveir af stærstu lífeyrissjóðum Danmerkur, ATP og PFA, ásamt sænska lífeyrissjóðs/tryggingarfélagsrisanum Folksam hafa gengið frá kaupunum á danska bankanum FIH sem var í eigu skilanefndar Kaupþings.

Danskir fjölmiðlar greina frá þessu í kvöld og vitna í frétt um málið á sjónvarpsrásinni TV2 Finans. Þar kom fram í kvöld að gengið hefði verið frá kaupunum á Hilton hótelinu við Kastrup flugvöll núna síðdegis.

Í frétt um málið á börsen.dk segir að þar með hafi tekist að selja FIH bankann áður en frestur til sölunnar, af hálfu bankaumsýslu Danmerkur (Finansiel Stabilitet), rann út en fresturinn náði til mánaðarmóta. Börsen segir jafnframt að bankaumsýslan hafi gert sölu bankans að skilyrði áður en FIH fékk ríkisábyrgð á skuldabréfaútgáfu fyrir allt að 50 milljarða danskra kr. eða rúmlega 1.000 milljarða kr. samkvæmt svokölluðum bankpakke II.

Hvorki ATP né PFA vildu staðfesta eða hafna frétt TV2 Finans í kvöld. Bjarne Graven forstjóri ATP segir að hann vilji ekki tjá sig um málið. Sama svar er að fá hjá PFA.

Ekkert kemur fram um verðið sem þessir lífeyrissjóðir greiddu fyrir FIH bankann. Sem kunnugt er af fréttum á Seðlabanki Íslands 500 milljóna evra, eða rúmlega 75 milljarða kr., veð í FIH. Söluverð bankans er þó talið vera meira en nemur þeirri upphæð.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.