Sigurður Einarsson neitar að biðja þjóðina afsökunar

Sigurður Einarsson, fyrrverandi stjórnarformaður Kaupþings banka, segist ekki ætla að biðja þjóðina afsökunar á framferði sínu þar sem hann hafi ekki haft neitt umboð frá henni, aðeins hluthöfum Kaupþings. Honum þykir samt leitt að starfsemi bankans hafi bitnað á fólkinu í landinu.

Sumir af þeim sem voru áberandi í íslensku viðskiptalífi fyrir hrun hafa beðið þjóðina afsökunar á framferði sínu. Þar má nefna Bjarna Ármannsson, Björgólf Thor Björgólfsson og þá sagði Jón Ásgeir Jóhannesson það í blaðagrein að hann hefði gert mistök og sér þætti það leiðinlegt.

Sigurður Einarsson, fyrrverandi stjórnarformaður Kaupþings banka, segist aðspurður ekki ætla að biðja þjóðina afsökunar. Þetta kemur fram í ítarlegu viðtali við Sigurð í helgarblaði Fréttablaðsins sem kemur út á morgun. Í viðtalinu segist Sigurður aðspurður að hann telji að þeir einir geti beðist afsökunar sem hafi umboð frá þjóðinni, og séu kosnir af henni í embætti. Hann hafi verið kosinn af hluthöfum Kaupþings og sé þar af leiðandi aðeins fær um að biðjast afsökunar á mistökum sem bitnuðu á hluthöfum og starfsfólki bankans. Sigurður segir að það sé annarra að biðjast afsökunar á skellinum sem lífskjör almennings hlutu í hruninu þó honum þyki leitt að starfsemi bankans með þeim endalokum sem urðu hafi bitnað á þjóðinni allri.

Í viðtali í helgarblaði Fréttablaðsins er ítarlega rætt við Sigurð um aðdraganda þess að hann komi til Íslands í síðustu viku. Í viðtalinu gagnrýnir Sigurður vinnubrögð sérstaks saksóknara harðlega og svarar skýrslu rannsóknarnefndar Alþingis fullum hálsi.