Tölvuþrjótur selur 1,5 milljón persónusíðna af Facebook

Í frétt um málið í Ekstra Bladet segir að netöryggisþjónustan Verisign iDefence hafi rakið slóðina af þessum þjófnaði til Kirolls en hann býður til sölu aðgangsorð að tölvupóstum og önnur lykilorð sem þar kunna að vera til staðar.

Sem fyrr segir selur Kirllos þessar upplýsingar í 1.000 eintaka skömmtum. Tvö verð eru í boði eftir því hvort viðkomandi hafi átt 10 vini eða færri á Facebook eða meira en 10 vini. Fyrir 10 vini eða færri þarf að borga 3.200 kr. fyrir skammtinn. Fyrir 1.000 síður með fleiri en 10 vinum hver þarf að borga 5.700 kr.

Rick Howard forstjóri Verisign iDefence segir að hafi einhver í höndum aðgangsorð að Facebook síðu þinni er stutt í að viðkomandi geti brotist inn á bankareikning þinn. Hægt er að nota persónulegar upplýsingar á Facebook til að byggja upp aðgang að öðrum viðkvæmum upplýsingum um viðkomandi.

Danska netöryggisþjónustan DK-Cert hvetur danska notendur Facebook til þess að skipta út aðgangsorðum sínum á netsíðunni. „Hér er um að ræða verslun milli glæpamanna," segir forstjóri DK Cert. „Við höfum dæmi þar sem aðgangur að tölvupósti hefur leitt til þess að skeyti hafa verið sent til vina viðkomandi um að hann væri í vandræðum erlendis og þyrfti á fé að halda til að komast heim."

Enn er ekki vitað hve mikið af hinum stolnu upplýsingum Kirllos hefur komið í verð hingað til.