Skuldabréf N1 á athugunarlista í Kauphöllinni

Kauphöllin hefur sett skuldabréfaflokk útgefnum af N1 á athugunarlista hjá sér. Ástæðan er tilkynning frá félaginu um að endurfjármögnun og endurfjármögnun BNT, móðurfélags N1, muni ekki ljúka fyrr en á næsta ári.

Í tilkynningu frá N1 segir að eins komið hefur fram áður þá eru lán BNT hf. og Umtaks fasteignafélags ehf. fallin í gjalddaga. Fyrir mánuði síðan birti Viðskiptablaðið frétt um að skuldir BNT og Umtaks næmu um 60 milljörðum kr.

„Unnið er áfram í samvinnu við viðskiptabanka félaganna að endurfjármögnun og endurskipulagningu efnahags samstæðunnar," segir í tilkynningunni.

N1 hf. sem er greiðandi að skuldabréfaflokki Esso 05 11 er dótturfélag BNT hf. og ber sjálfskuldarábyrgð á hluta af lánum BNT hf. eins og bent var á tilkynningu þann 13.7. 2010. Umtak fasteignafélag ehf. er 49% í eigu N1 hf og er félagið aðal leigusali N1 hf.

Í upphafi var stefnt að því að vinna við endurfjármögnun og endurskipulagningu myndi ljúka á árinu 2010, nú er ljóst að vinnan mun taka lengri tíma og ekki klárast fyrr en á fyrri hluta næsta árs, að því er segir í tilkynningunni.