Þrjá mánuði að skrá Haga í Kauphöll

Það tekur að lágmarki þrjá mánuði að skrá Haga í Kauphöllina eftir að slík beiðni er lögð þar inn, að sögn forstjóra Kauphallarinnar. Óvíst er hvað Arion banki þarf að afskrifa mikið vegna 1998 ehf., fyrrum eiganda Haga, en það gætu orðið fjörutíu milljarðar króna.

Arion banki heldur nú utan um 98 prósenta hlut í Högum en 2 prósent eru í eigu stjórnendanna, Guðmundar Marteinssonar, framkvæmdastjóra Bónuss, Finns Árnasonar, forstjóra Haga og Jóhönnu Waagfjörð, fjármálastjóra Haga.

Gæti þurft að afskrifa 40 milljarða króna

Algjörlega óvíst er hvað Arion banki þarf að afskrifa mikið af skuldum þegar bankinn skráir Haga í Kauphöllina og selur síðan fyrirtækið í opnu söluferli. Rekstrarskuldir Haga eru 12-15 milljarðar króna og auk þess er gamla móðurfélagið 1998 ehf. algjörlega eignalaust og afar skuldsett, en miðað við gengisbreytingar lána til félagsins sem veitt voru þegar Hagar voru keyptir úr Baugi sumarið 2008, eru skuldir félagsins yfir 40 milljarðar króna.

Gaumur, félag Jóns Ásgeirs Jóhannessonar og fjölskyldu, ISP, sem er í eigu Ingibjargar Pálmadóttur, og Bague, sem er í eigu Hreins Loftssonar, eru í ábyrgð vegna lána til félagsins 1998 en óvíst er hvort gengið verður að þessum ábyrgðum. Jafnframt er í lausu lofti hvað Arion banki fær mikið fyrir Haga í opnu söluferli.

Finnur Sveinbjörnsson, bankastjóri Arion banka, segir að Arion banki hafi sínar hugmyndir um verð en ekki sé rétt að vera með vangaveltur um hugsanlegt útboðsgengi bréfa í Högum þegar fyrirtækið verður skráð í Kauphöllina.

Þórður Friðjónsson, forstjóri Kauphallarinnar, segir skráningu í Haga í Kauphöll afar jákvæð tíðindi. En hvað tekur langan tíma að skrá fyrirtækið á markað? „Svona ferli hjá okkur tekur kannski þrjá mánuði. Þetta fer mikið eftir aðstæðum og hvernig útboðs- skráningarlýsing, og sú vinna mun ganga. Væntanlega erum við að tala um í fyrsta lagi núna í vor," segir Þórður.