Vangaveltur um að Pfizer losi Deutsche Bank við Actavis

Financial Times greinir frá því að bandaríski lyfjarisinn Pfizer gæti losað Deutsche Bank við höfuðverkinn Actavis. Þetta virðist upplagður samingur, Pfizer þarf að eignast samheitalyfjafyrirtæki og Deutsche Bank þarf að losna við um 4 milljarða evra sem bankinn lánaði Actavis þegar Björgólfur Thor Björgólfsson keypti félagið 2007.

Fram kemur í blaðinu að þegar Actavis var til sölu fyrir hálfu öðru ári síðan hafi Pfizer verið í hópi áhugasamra kaupenda. Hinsvegar hafi Pfizer hætt við kaupin þá og í staðinn keypt Wyeth fyrir 45 milljarða punda.

Hinsvegar gæti Pfizer haft varann á sér við kaup á Actavis þar sem félagið sé afurð 25 samruna á þeim 11 árum sem liðin eru frá stofnun þess..."og er lítið annað en bland í poka fyrirtækja" (hodge-podge businesses) eins og það er orðað í Financial Times.

Hvað Deutsche Bank varðar gæti salan á Actavis losað bankinn við vandræðalega afskrift á láninu til Actavis og þar með losnað við langstærsta áhættulánið sem enn er í bókhaldi bankans.

Eins og kunnugt er af fréttum reyndi Actavis að kaupa þýska samheitalyfið Ratiopharm með stuðningi Deutsche Bank en tókst ekki. Bankinn ætlaði að setja sameinað félag á markað og ná þannig lán i sínu til baka.