Segja Sparisjóðabankann hafa farið fram með offorsi

Hluthafar tveggja félaga sem voru sett í þrot af Sparisjóðabankanum vegna gengislána ætla í skaðabótamál við skilanefnd bankans. Fyrrverandi stjórnarformaður félaganna segir skilanefndina fara fram með offorsi og sakar hana um að beita klíkuskap við yfirtöku á félögum.

Einkahlutafélögin Spor og Sporbaugur ráku heildsöluverslun og verslanir með skófatnað. Síðasta haust keypti félagið S4S skóverslanirnar Steinar Waage, skór.is og Ecco út úr Sporbaugi. Stefán Bragi Bjarnason, fyrrverandi stjórnarformaður félaganna, segir þetta hafa verið gert í samráði við stærsta kröfuhafa félaganna, Byr Sparisjóð. Eftir hafi setið um fimmhundrað milljóna króna skuld við Sparisjóðabanka Íslands sem tók félögin yfir og fengið í leiðinni tvöhundruð milljónir króna í reiðufé og lager. Félögin voru svo tekin til gjaldþrotaskipta þann 21. desember síðastliðinn. Við þetta eru forsvarsmenn félaganna afar ósáttir:

„Allar þessar skuldir eru vegna gengistengdum lánum sem núna eru líklega orðin ólögleg. Það var engin önnur ástæða fyrir því að fyrirtækin voru orðin gjaldþrota heldur en hækkun þeirra lána."

Stefán Bragi vandar skilanefnd Sparisjóðabankans ekki kveðjurnar. „Okkur er ekki stætt á öðru en að höfða skaðabótamál á hendur þessum mönnum. Þeir fara fram með þvílíku offorsi," segir Stefán Bragi.

Hann er þó ekki viss um að það hafi neitt upp á sig þar sem að Sparisjóðabankinn er gjaldþrota. „Nei, en hvað á maður að gera? Ef maður telur að á sér sé brotið, þá verður maður að sækja rétt sinn."

Skilanefndin hefur einnig leyst til sín félagið Seven Miles sem var eitt þeirra félaga sem átti Spor og Sporbaug. Hluthafar höfðuðu mál sem hefur ítrekað verið vísað í hérað frá Hæstarétti.

„Þeir taka félagið yfir, skipta um stjórn og setja það í gjaldþrot án þess að upplýsa eigendur eða stjórna. Þeir gera þetta í skjóli myrkurs og með því að beita klíkustarfsemi inni í Hlutafélagaskrá," segir Stefán Bragi.

Ekki náðist í skilanefnd Sparisjóðabankans í dag.