Fjárlaganefndarformaður Dana segir þvert nei við Ísland

Þetta er haft eftir Kristian Thulesen Dahl í dönskum miðlum. Dahl er þingsflokksformaður danska Þjóðarflokksins sem er stuðningsflokkur ríkisstjórnar Venstre og Íhaldsflokksins.

Dahl er einnig formaður fjárlaganefndar danska þingsins en nefndin hefur fyrir sitt leiti samþykkt norræna lánapakkann til Íslands og hefur þegar greitt út 600 milljónir danskra króna til Íslendinga. Dahl vill hins vegar að ekki verði að frekar greiðslum fyrr staða íslendinga skýrist.

Það er óskynsamlegt að senda peninga til Íslands ef enginn vilji er fyrir hendi hjá þjóðinni til að borga lánið til baka, segir Dahl við Jyllands Posten.

Steingrímur J. Sigfússon fjármálaráðherra er væntanlegur til Danmerkur og mun þar eiga fund með Claus Hjort Frederiksen fjármálaráðherra dana um málið.

Viðbrögðin við ákvörðun forseta Íslands um að skrifa ekki undir Icesavelögin hafa almennt verið mjög hörð í Danmörku.