Styrkir Grikkland og Evrópu

George Papandreou, forsætisráðherra Grikklands, segir að vegna samkomulags evruríkjanna vegna efnahagserfiðleika Grikklands komi landið sem og Evrópa til með að styrkjast. Grísk stjórnvöld glíma við gífurlegan skuldavanda og kynntu í febrúar umfangsmiklar aðhaldsaðgerðir sem var mótmælt á götum úti.

Forsætisráðherrann viðurkennir að langt sé þangað til að Grikkir komist út úr erfiðleikum sínum. Samkomulag evruríkjanna gefi landinu þó ákveðið svigrúm. Það felur í sér að Grikkjum verði veitt rúmlega 20 milljarða evra lán, en aðeins ef aðrir lánamöguleikar á frjálsum markaði lokist alveg.

Matsfyrirtækið Fitch Ratings lækkaði fyrir helgi lánshæfieinkunn ríkissjóðs Grikklands úr BBB+ í BBB-.