Bretar óttast áhlaup á pundið í kjölfar kosninga

Í frétt um málið í Guardian segir að áhlaupið geti orðið staðreynd aðeins örfáum klukkustundum eftir að kjörstöðum lokar á kosningadag. Í fyrsta skipti í sögunni verður markaður með framvirka samninga (futures) í skuldabréfaviðskiptum opinn frá klukkan eitt um nóttina eða sjö tímum fyrr en venjulega.

Markaðurinn sem hér um ræðir gefur tóninn um hvaða vextir fjárfestar telja að bresk ríkisskuldabréf eigi að bera í náinni framtíð. Euronext Liffe sem rekur þennan markað segir að ný tækni geri þeim kleyft að opna markaðinn þetta snemma að nóttu til.

Talsmaður Euronext Liffe segir að þessa nótt muni fjárfestum verða leyft að veðja á hrun pundsins en það er nokkuð sem skuggaráðherrann George Osborne hefur aðvarað að gerist ef ekki næst meirihluti í breska þinginu í kosningunum.

Í frétt Guardian segir að hundruð milljóna punda gætu græðst eða tapast þessa nótt þar sem erlendir gjaldmiðlasalar reyna að spá í úrslit kosninganna.

Gengi pundsins hefur sífellt dalað frá upphafi kreppunnar 2008 en þá stóð það í 2 dollurum. Um áramót var það komið niður í 1,70 dollar og í síðustu viku var gengið komið í 1,50.