Áhugi á óverðtryggðum ríkisbréfum dvínar ekki

Þetta kemur fram í Morgunkorni greiningar Íslandsbanka þar sem segir að um þetta vitni mikil spurn eftir lengsta ríkisbréfaflokknum, RIKB25, í fyrsta ríkisbréfaútboði Lánamála ríkisins þetta árið, en það var haldið síðastliðinn föstudag.

Alls bárust tilboð að fjárhæð 10,2 miljarða kr. í flokkinn. Af þeim var tilboðum fyrir 8,3 milljarða kr. tekið á 8,07% ávöxtunarkröfu. Lífeyrissjóðir og aðrir innlendir stofnanafjárfestar hafa verið stórtækir kaupendur RIKB25 í undanförnum útboðum og gerir greiningin ráð fyrir að sú hafi einnig verið raunin nú.

Mun minni áhugi reyndist á hinum flokknum sem í boði var, RIKB11. Aðeins bárust tilboð að fjárhæð 4,3 milljarða kr. og var þeim öllum hafnað. Þetta er annað útboðið í röð þar sem fallið er frá sölu RIKB11 vegna lítillar spurnar.

„Teljum við þessar dræmu undirtektir til marks um að erlendir fjárfestar hafi ekki haft áhuga á þátttöku í útboðinu að þessu sinni. Útlendingar virðast mun áhugasamari um ríkisvíxla en stutt ríkisbréf þessa dagana. Teljum við það hafa átt sinn þátt í breyttum áherslum í útgáfu ríkisskuldabréfa þetta árið þar sem ákveðið var að bæta í útgáfu ríkisvíxla fremur en draga úr henni líkt og áætlanir í fyrra gerðu ráð fyrir. Gæti orðið torsótt að byggja upp þennan flokk næsta kastið, en hugsanlega léttist sá róður eftir því sem líður á árið og líftími hans styttist," segir í Morgunkorninu.

„Þrátt fyrir að ekki hafi verið seld RIKB11-bréf að þessu sinni er okkar mat að ríkissjóður megi vel una við niðurstöðu föstudagsins. Eftir útboðið eru ríflega 64 milljarða kr. útistandandi í RIKB25-flokknum auk verðbréfalána og er hann því orðinn sambærilegur flestum hinna ríkisbréfaflokkanna að stærð þrátt fyrir að hafa fyrst litið dagsins ljós fyrir hálfu ári síðan."

Í Morgunkorninu kemur ennfremur fram að segja megi að það hafi verið nokkuð kjarkað af ríkissjóði að ráðast í uppbyggingu á óverðtryggðum skuldabréfaflokki með svo langan líftíma í því mikla óvissuástandi sem ríkti síðastliðið sumar, og hefur raunar að miklu leyti verið við lýði síðan. Spurn eftir bréfunum hefur hins vegar reynst veruleg, sér í lagi hjá íslenskum langtímafjárfestum.

„Teljum við til að mynda að flokkurinn fari nú nærri því að fylla hálft annað prósent af eignasafni lífeyrissjóðanna, sem má telja harla góðan árangur fyrir ríkissjóð í ljósi þess að margir töldu til skamms tíma illmögulegt að byggja upp óverðtryggðan langtíma vaxtaferil á íslenskum skuldabréfamarkaði. Uppbygging slíks ferils er raunar forsenda þess að hægt sé að bjóða íslenskum fyrirtækjum og einstaklingum upp á langtíma óverðtryggð lán á föstum vöxtum, til að mynda íbúðalán," segir í Morgunkorninu.