Framtakssjóðurinn átti næsthæsta tilboðið í Sjóvá

Framtakssjóður Íslands, sem er í eigu lífeyrissjóða, átti næsthæsta tilboðið í hlut Seðlabankans í Sjóvá. Hópur fjárfesta undir forystu Heiðars Más Guðjónssonar sem hefur hætt við kaupin vegna seinagangs telur sig ekki hafa fengið skýringar frá Seðlabankanum á töfum.

Lögmaður hópsins segir að Seðlabankanum hafi verið veittur frestur til 22. október síðastliðins til að staðfesta kaupsamninginn fyrir sitt leyti, ella teldi hópurinn að söluferlinu væri lokið án þess að kaup hefðu tekist.

Föstudaginn 22. október átti Heiðar Már fund með Má Guðmundssyni seðlabankastjóra, en þar var honum tjáð, samkvæmt heimildum fréttastofu að svars væri að vænta stuttu eftir helgina. Síðan þá hefur þetta tafist, en fjárfestarnir telja sig ekki hafa fengið eðlilegar skýringar á þessu hjá Seðlabankanum.



Of langur tími liðinn

Meðal þess sem réði því að hópurinn dró sig út úr söluferlinu er að of langur tími er liðinn og framkvæma hefði þurft nýja áreiðanleikakönnun á Sjóvá, samkvæmt upplýsingum fréttastofu. Guðlaugur Þór Þórðarson, alþingismaður, spurði Steingrím J. Sigfússon, fjármálaráðherra, um þessar taflir á söluferlinu í óundirbúnum fyrirspurnum á Alþingi í dag. „Fjármálaráðuneytið hefur ekki verið þátttakandi í þessari úrvinnslu sem slíkri, hins vegar upplýsir Seðlabankinn af og til almennt um hvernig gengur að vinna úr eignunum sem þarna voru sameinaðar á einum stað. (....) Ég held að það sé eðlilegast að vísa því til Seðlabankans að svara því hvers vegna ekki var gengið að þessu tilboði og ég geri ráð fyrir því að þar sé hægt að fá upplýsingar um það," sagði Steingrímur.

Seðlabankinn sendi frá sér yfirlýsingu nú undir kvöld þar sem segir að bankanum sé óheimilt að tjá sig um ástæður tafanna. Bankanum sé óheimilt að tjá sig um málefni einstakra aðila sem hann hafi til umfjöllunar. Orðrétt segir í yfirlýsingunni: „Staðfest er að ekki var mögulegt að taka afstöðu til sölunnar á Sjóvá fyrir 22. október s.l., sem var frestur sem kaupendahópurinn gaf seljanda. Áður en fresturinn rann út var lögmaður kaupendahópsins og einn meðlima hans upplýstir um þessa niðurstöðu og ástæðu hennar á fundi í Seðlabanka Íslands. Almennt gildir sú regla að Seðlabanka Íslands er óheimilt að tjá sig um málefni einstakra aðila sem hann hefur til umfjöllunar. Því getur Seðlabankinn að svo stöddu ekki tjáð sig opinberlega um ástæðu þess að ekki var hægt að veita svar fyrir ofangreindan tímafrest."

Framtakssjóðurinn með næst hæsta tilboðið

Framtakssjóður Íslands, sem er í eigu nokkurra lífeyrissjóða, næst hæsta tilboðið í Sjóvá. Finnbogi Jónsson, framkvæmdastjóri sjóðsins, staðfesti þetta í samtali við fréttastofu í dag. Sjóðurinn var hins vegar með annars konar tilboð og vildi kaupa fyrirtækið í heild sinni. Finnbogi sagði að tilboð sjóðsins væri löngu fallið úr gildi og algjörlega óvíst hvort sjóðurinn myndi bjóða í Sjóvá ef fyrirtækið yrði auglýst að nýju til sölu. Ekki hefur verið tekin ákvörðun um næstu skref hjá Íslandsbanka sem annast söluferlið, samkvæmt upplýsingum þaðan. Fram kom í dag að Seðlabankinn hyggðist óska eftir þremur stjórnarmönnum og þar með meirihluta í stjórn Sjóvár fyrir næsta aðalfund fyrirtækisins.