Jónína: „Hótaði ekki - talaði bara götumál sem útrásarvíkingar skilja“

Jónína Benediktsdóttir beitti verulegum þrýstingi á forstjóra Kaupþings vegna fjármuna sem hún taldi sig eiga inni hjá bankanum. Hún þvertekur þó fyrir að hafa beitt fjárkúgun. Allt að sex ára fangelsi liggur við slíku broti.

Í nýrri bók sinni segir Jónína Benediktsdóttir að hún hafi handsalað samning við Hreiðar Má Sigurðsson, þáverandi forstjóra Kaupþings, um að bankinn keypti af henni fasteign í Bryggjuhverfinu á 70 milljónir króna. Með slíku lausafé hefði hún getað gert upp skuldir vegna fyrirtækis síns, Planet Pulse, og átt afgang fyrir sjálfa sig.

Í bókinni birtir hún samning frá febrúar 2003 um 3 milljóna króna lán án veða sem bankinn veitti henni og hún segir að hafi verið til staðfestingar á fasteignakaupunum. Síðar segir hún Hreiðar hafa hætt við kaupin og hafi hún þá reiðst mjög og talið að Jón Ásgeir hafi átt þar hlut að máli.

Síðar hafi hún farið á fund Hreiðars og ýjað að því að hún myndi kjafta frá um Hreiðar og spurt hann hvort konan hans vissi hvað hann væri að gera í utanlandsferðum sínum. Síðar fór hún með kvaðningar til Hreiðars sem tengdu forkólfa í viðskiptalífinu við gleðskap á snekkju Jóns Ásgeirs árið 2001 þar sem gleðikonur eru sagðar hafa verið viðstaddar og spurði hvort hún ætti frekar að fara með þær í fjölmiðla.

Eftir þetta fékk Jónína bréf frá Kaupþing þar sem henni er tilkynnt að 3 milljóna lánið, sem hún segir að hafi verið greiðsla vegna fasteignakaupanna sem ekki gengu í gegn, hafi verið afskrifað hjá bankanum.

Í hegningarlögum er lagt allt að sex ára fangelsi við því að hafa fé af öðrum með því að hóta að hafa uppi sakburð um vansæmandi háttsemi hans, þótt sannur sé, en slík brot fyrnast á tíu árum. Hvorki lögregla né ríkissaksóknari vildu tjá sig neitt um málið, en eftir því sem fréttastofa kemst næst mun fátítt að mál af þessum toga séu tekin til rannsóknar nema kæra liggi fyrir.

Jónína vildi ekki veita fréttastofu viðtal, en útilokaði þó með öllu að í orðum hennar hefði falist hótun í garð Hreiðars, að hún hefði beitt hann kúgunum eða brotið lög. Hún hafi reynt allt annað og að lokum hafi hún talað það götustrákamál sem þessir menn skildu.