Töluverð lækkun húsnæðisverðs enn í pípunum

Fjallað er um málið í Morgunkorni greiningarinnar. Þar segir að í efnahagsspá Seðlabankans er því spáð að íbúðaverð lækki enn frekar á þessu og næsta ári líkt og var gert í nóvemberspá bankans. Reiknaði bankinn með því í nóvember að íbúðaverð muni að raunvirði lækka um nær 50% í þessari kreppu og að nafnvirði muni verðið lækka um ríflega 27% og ná botni á fyrsta fjórðungi 2011.

Gerir bankinn þá ráð fyrir að íbúðaverð muni verða nær 14% undir langtímameðaltali sem merkir að þegar litið er lengra fram í tímann þá gæti leiðrétting átt sér stað til hækkunar umfram þá hækkun sem eðlilegt er að húsnæðisverð taki til lengri tíma.

Eins og kunnugt er hefur sá samdráttur sem orðið hefur í efnahagslífinu komið verulega hart niður á íðbúðamarkaðnum. Þessi þróun er í takt við það sem við mátti búast enda hefur reynsla annarra landa leitt í ljós að fjármálakreppur hafa oftast í för með sér skarpa og djúpa lækkun íbúðaverðs og sérstaklega kreppur sem koma í kjölfar þess að verðbóla myndast á fasteignamarkaðinum líkt og hér var.

Reikna má með að íbúðaverð komi til með að gefa enn meira eftir og endurspegla væntingar um það hvort tveggja ástandið á framboðs- og eftirspurnarhlið markaðarins. Hin mikla uppsveifla undanfarinna ára á íbúðamarkaði hefur orðið til þess að nú þegar ládeyða hefur verið á þessum markaði situr eftir mikill fjöldi óseldra íbúða á framboðshlið markaðarins sem skapar frekari þrýsting til verðlækkunar.

Við þetta ástand bætist mikið og vaxandi atvinnuleysi, svo og minnkandi kaupmáttur ráðstöfunartekna heimilanna sem samkvæmt efnahagsspá Seðlabankans dregst saman um 9,7% í ár og önnur 1,6% á næsta ári.

Spá Seðlabankans íbúðaverð hefur verið nokkuð óbreytt um skeið og hefur þróunin verið í takti við hana. Nú hefur íbúðaverð á höfuðborgarsvæðinu lækkað um 15,5% að nafnvirði frá því að það náði toppi í byrjun árs 2008 en um 37,2% að raunvirði. Á landinu öllu er lækkunin að nafnvirði 13,4% og 35,1% að raunvirði. Samkvæmt þessu er enn töluverð lækkun húsnæðisverðs í pípunum, að því er segir í Morgunkorninu.