Steinunn neitar að benda á eignir þrátt fyrir áskorun Jóns Ásgeirs

Formaður slitastjórnar Glitnis, neitar að gefa upplýsingar um hvaða eignir hafa fundist erlendis sem þrotabúið telur tilheyra sjömenningum sem stefnt var í New York. Jón Ásgeir Jóhannesson skorar á formanninn að benda á eignirnar og segir að engar slíkar eignir séu til.

Eins og fréttastofa greindi frá í gær sagði Steinunn Guðbjartsdóttir, formaður slitastjórnar Glitnis, að slitastjórnin hefði fundið fjármuni erlendis sem vísbendingar væru um að tilheyrðu sjömenningunum sem stefnt var í New York.

Jón Ásgeir Jóhannesson, einn hinna stefndu, brást við þessu með því að senda frá sér yfirlýsingu í dag þar sem hann hvetur Steinunni til að tilgreina þá peninga og þær eignir sem hafi fundist. „Hvar eru þessir fjármunir? Mér er ekki kunngt um þessar eignir en þætti vænt um ef Steinunn og starfsmenn Kroll hafa fundið peninga og eignir sem mér tilheyra og ekki hefur verið gerð grein fyrir áður. Ég veit að það mun reynast erfitt því þessi verðmæti eru ekki til," segir Jón Ásgeir í yfirlýsingunni.

Vegna kyrrsetningarmáls sem slitastjórnin höfðaði gegn Jón Ásgeir fyrir breskum dómstóli og gildir um eignir hans á heimsvísu þurfti hann að skila tæmandi lista yfir eignir sínar og gefa eiðsvarna yfirlýsingu um að listinn gefi rétta mynd af eignum hans. Það getur varðað refsingu að gefa rangar upplýsingar um eignir í máli af þessu tagi. Þess vegna ber slitastjórninni að tilkynna breskum yfirvöldum um að eignir, aðrar en þær sem eru á listanum, hafi fundist.

Í ljósi þess hversu avarlegt það er að gefa rangar upplýsingar, þá spurði fréttastofa Steinunni Guðbjartsdóttur að því í dag hvort slitastjórnin hefði látið dómara í kyrrsetningarmálinu í Lundúnum vita um eignirnar og ef svo væri ekki, hvort slíkt væri þá staðfesting á því að eignirnar sem fundust tilheyrðu einhverjum öðrum en Jóni Ásgeiri. Svar Steinunnar var svohljóðandi: „Ég get ekki svarað neinu til um það. Ég mun ekkert tjá mig um þetta frekar." Þá varð hún ekki við ósk fréttastofu um viðtal.

Þetta er ekki í fyrsta sinn sem slitastjórn Glitnis sakar Jón Ásgeir um að hafa skotið undan fjármunum, því í eiðsvarinni yfirlýsingu Steinunnar fyrir breskum dómstólum var látið í veðri vaka að Jón Ásgeir ætti fjármuni, 202 milljónir punda í bankainnstæðum, jafnvirði 35 milljarða króna. Rannsóknarfyrirtækið Kroll dró þessa ályktun af tölvupósti sem Jón Ásgeir sendi Jóni Sigurðssyni og Lárusi Welding skömmu fyrir bankahrun með yfirskriftinni „for your eyes only." Í ljós kom að um var að ræða innstæður sem tilheyrðu Iceland Foods verslanakeðjunni. Var það staðfest af Malcolm Walker, forstjóra Iceland, í fréttum Stöðvar 2 og í undirritaðri yfirlýsingu nokkurra viðskiptabanka fyrirtækisins.

Jón Ásgeir Jóhannesson er kvæntur Ingibjörgu Pálmadóttur sem er stærsti hluthafinn í 365 miðlum sem eiga og reka fréttastofu Stöðvar 2 og Vísis.