Jón Ásgeir skorar á Steinunni að skýra mál sitt

Jón Ásgeir Jóhannesson skorar á Steinunni Guðbjartsdóttur, formann slitastjórnar Glitnis, að tilgreina þá peninga og eignir sem hún og rannsóknarfyrirtækið Kroll segjast hafa fundið. Í fréttum Stöðvar 2 í gærkvöldi var haft eftir Steinunni að Kroll telji sig hafa fundið eignir sem vísbendingar séu um að tilheyri sjömenningunum sem slitastjórnin hefur stefnt fyrir dómi í New York.

Jón Ásgeir er einn sjömenninganna og er honum ekki kunnugt um þessar eignir að eigin sögn. „Hvar eru þessir fjármunir? Mér er ekki kunngt um þessar eignir en þætti vænt um ef Steinunn og starfsmenn Kroll hafa fundið peninga og eignir sem mér tilheyra og ekki hefur verið gerð grein fyrir áður. Ég veit að það mun reynast erfitt því þessi verðmæti eru ekki til," segir Jón Ásgeir meðal annars.

Óljósar aðdróttanir

Hann gagnrýnir slitastjórnina sem virðist ekki geta setið á sér að koma með „óljósar aðdróttanir" í sinn garð nær vikulega. „Á sama tíma heldur slitastjórnin því fram að hún reki málið ekki í fjölmiðlum," bætir hann við.

„Ef slitastjórnin hefur komist að því, að ég eða aðrir eigi eignir erlendis sem fengnar hafa verið með ólögmætum hætti, þá skora ég á hana að tilkynna þarlendum og innlendum yfirvöldum um það," segir hann einnig. „Af hverju hefur það ekki verið gert? Jú, vegna þess að það eru engar eignir til sem voru fengnar með ólögmætum hætti."

Misheppnuð veiðiferð

Að mati Jóns Ásgeirs mun „þessi misheppnaða veiðiferð" slitastjórnarinnar engu skila þrátt fyrir mikinn tilkostnað, en Jón segir að þegar sé búið að eyða 1.850 milljónum króna í kostnað vegna málaferlanna í New York. „Fyrir þá tölu mætti kaupa ágætan togara. Ég veit að kröfuhafar hafa óskað eftir upplýsingum, um kostnað vegna málaferlanna í New York og mögulegar heimtur, án árangurs. Af hverju er Steinunn ekki tilbúin að veita kröfuhöfum, sem eru vinnuveitendur hennar, þessar upplýsingar? Það hlýtur að vera rannsóknarefni út af fyrir sig," segir Jón að lokum.

Sjömenningarnir sem stefnt hefur verið eru þau Jón Ásgeir Jóhannesson, Þorsteinn Jónsson, Jón Sigurðsson, Lárus Welding, Pálmi Haraldsson, Hannes Smárason og Ingibjörg Pálmadóttir.

Yfirlýsingin frá Jóni Ásgeiri Jóhannessyni er hér að neðan í heild sinni: