Kroll telur sig hafa fundið faldar eignir Jóns Ásgeirs og félaga

Slitastjórn Glitnis telur sig hafa fundið eignir sem tilheyra sjömenningunum sem hún hefur stefnt fyrir dómi í New York. Slitastjórnin telur sig geta endurheimt töluverða fjármuni í þeirra eigu, vinni hún málið fyrir dómi.

Þetta kom fram á upplýsingafundi með slitastjórn og skilanefnd Glitnis í dag. Rannsóknarfyrirtækið Kroll hefur unnið að því að leita uppi eignir sjömenninganna í marga mánuði.

Slitastjórnin telur sig nú hafa fundið eignir erlendis en vísbendingar séu um að þær tilheyri hinum stefndu.

Eins og fram hefur komið vill slitastjórnin 250 milljarða í skaðabætur, eða sem nemur tjóninu sem hún telur sjömenningana hafi unnið bankanum. Steinunn Guðbjartsdóttir, formaður slitastjórnar Glitnis, sagði á fundinum í dag að engar vonir væru bundnar við að fá upp í þá kröfu að fullu, en þó væri búist við að með þessum aðgerðum yrðu talsverðir fjármunir endurheimtir í þágu kröfuhafa bankans.

Telur slitastjórnin fullvíst að ef málið vinnist fyrir dómi sé í miklar eignir að sækja.

Sjömenningarnir sem stefnt hefur verið eru þau Jón Ásgeir Jóhannesson, Þorsteinn Jónsson, Jón Sigurðsson, Lárus Welding, Pálmi Haraldsson, Hannes Smárason og Ingibjörg Pálmadóttir.

Auk þess hefur endurskoðunarfyrirtækinu PriceWaterHouseCoopers verið stefnt.