„Konur eru ekki óþekkar á sunnudögum“

Fjölmörg kvennasamtök standa að kvennafrídeginum, 24. október 2010. Þá verða liðin 35 ár frá fyrsta kvennafrídeginum. Þá gengu konur úr vinnu og héldu einn stærsta fjöldafund sem haldinn hefur verið hérlendis í Reykjavík. Hugmyndin er að kvennafríið nú verði með öðru sniði, segir Guðrún Jónsdóttir ein talskvenna framtaksins.

„Við höfum ákveðið að þann 24. október á 35 ára afmæli kvennafrídagsins, eða kvennaverkfallsins eftir því hvernig konur skilgreina það í huga sér, ætlum við að halda alþjóðalega ráðstefnu. Það er sunnudagur og konur eru ekki óþekkar á sunnudögum. Það hefur lítið upp á sig," segir Guðrún.

Viðfangsefni ráðstefnunnar er ofbeldi gegn konum og segir Guðrún að von sé á fjölda erlendra gesta. Heiðursgestur verður Rashida Mansjoo sem er umboðsmaður Sameinuðu þjóðanna í ofbeldismálum sem varða konur. „Það að hún skuli koma hingað er mikill heiður og setur þessa ráðstefnu á mikinn stall," segir Guðrún.

Leggja niður vinnu

Daginn eftir ætla konur að leggja niður vinnu, að sögn Guðrúnar. „Mánudaginn 25. október ætlum við að vinna sanngjarnan vinnudag miðað við launin okkar og gera það sama og við gerðum árið 2005. Þá söfnuðust 50 þúsund konur saman á götum borgarinnar klukkan 14:08. Þá höfðu við unnið 2/3 hluta vinnudagsins en það samsvarar þeim launum sem við höfum miðað við karla þegar heildarlaunin eru skoðuð."

Nákvæm tímasetning liggur ekki fyrir. „Við bíðum eftir tölum til að reikna út hver stundin verður í ár en við teljum að það sé mjög áhugavert að vita á hvaða leið við erum og hversu hratt við förum," segir Guðrún.

Nánari upplýsingar um viðburðinn má finna á vefsetrinu kvennafri.is.