Telja að bankinn hafi blekkt með ársreikningum

ÞÞ og JHH skrifar 1. desember 2010 15:18

Herdís Hallmarsdóttir, fulltrúi í slitastjórn (t,h) segir að ekki hafi veirð rétt staðið að flokkun á vensluðum aðilum í Landsbankanum og áhættuskuldbindingum vegna útlána til þeirra.

Slitastjórn Landsbankans telur að bankinn hafi veitt rangar upplýsingar í ársreikningum árið 2007 og ætlar að krefjast bóta frá endurskoðendum af þeim sökum.

Fram kom á fundi skilanefndar og slitastjórnar Landsbankans í dag að bankinn hafi verið kominn langt undir lögmætt eiginfjárhlutfall töluvert löngu áður en hann féll í október 2008. Þá sagði Herdís Hallmarsdóttir, meðlimur í slitastjórn Landsbankans, að slitastjórnin teldi að ekki hafi verið staðið rétt að flokkun venslaðra aðila og þar með áhættuskuldbindingum vegna útlána til þeirra. Aðspurð sagði hún að slitastjórnin teldi að bankinn hafi brotið reglur um stórar áhættuskuldbindingar vegna lána til félaga í eigu Björgólfs Thors Björgólfssonar á árinu 2007 og 2008.

Fréttamaður: Er það svo að þið teljið þið að ársuppgjör bankans hafi ekki gefið rétta mynd af stöðu hans árið 2007?

„Rétt," sagði Herdís aðspurð um þetta atriði. Þar vísaði hún til þess að skilanefnd og slitastjórn hefðu tilkynnt fyrrum ytri endurskoðendum Landsbankans, PricewaterhouseCoopers, um hugsanlega bótaskyldu fyrirtækisins vegna vanrækslu við endurskoðun á ársreikningum bankans vegna ársins 2007 og áritunar árshlutareikninga árið 2008.

Herdís sagði jafnframt að slitastjórnin hefði átt samskipti við þá endurskoðendur sem í hlut ættu og óskað eftir vinnugögnum til að afla sér nánari upplýsinga um reikningskil þetta ár. Endurskoðendur hafi ekki orðið við þeirri kröfu og ekki viljað afhenda gögnin.

Tengdar fréttir

Telur ekki grundvöll fyrir málsókn gegn sér

Halldór Kristjánsson, fyrrverandi bankastjóri Landsbanka Íslands, segir að Landsbankinn hafi keypt ábyrgðartryggingu í Bretlandi fyrir starfsfólk sitt. Slitastjórn bankans hafi tilkynnt hlutaðeigandi tryggingafélagi að hún telji að kröfurnar falli undir trygginguna. Þetta kemur fram í orðsendingu sem Friðjón Örn Friðjónsson, lögmaður Halldórs sendi fjölmiðlum.

1. desember 2010 15:43

Slitastjórn Landsbankans krefur stjórnendur um 37 milljarða

Sigurjón Þ. Árnason og Halldór J. Kristjánsson, fyrrverandi bankastjórar Landsbankans, eru hvor fyrir sig krafðir um 37 milljarða króna en slitastjórn Landsbankans hefur ákveðið að höfða skaðabótamál á hendur þeim vegna meintrar vanrækslu. Þá er Elín Sigfúsdóttir krafin um 18 milljarða króna.

1. desember 2010 12:00

Sigurjón verst líka riftun og segist gjaldþrota gangi hún eftir

Sigurjón Þ. Árnason, fyrrverandi bankastjóri Landsbankans, segir að gangi 300 milljóna króna riftunarmál sem slitastjórn Landsbankans hefur höfðað á hendur honum vegna launauppgjörs verði hann gjaldþrota. Lögmaður hans segist ekki skilja hvers vegna slitastjórn sé að krefja hann um 37 milljarða þar sem hann hafi að mestu verið atvinnulaus frá 8. október 2008.

1. desember 2010 14:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir