Breska fjármálaeftirlitið reyndi ekki að stöðva innlánasöfnun

Breska fjármálaeftirlitið, FSA, aðhafðist ekkert til þess að hindra það að Kaupþing setti á fót Edge reikningana í Bretlandi átta mánuðum áður en bankinn hrundi. Ástæðan er sú að FSA taldi að með því að safna innlánum gæti bankinn bætt lausafjárstöðu sína. Frá þessu er sagt á vef Telegraph í kvöld.

Í fréttinni er sagt frá því að Rannsóknardeild alvarlegra efnahagsglæpa sé nú að rannsaka hvort Kaupþing hafi blekkt breska innistæðueigendur þegar Edge reikningarnir voru kynntir fyrir sparifjáreigendum.

Gerðu ekkert

Blaðið segir frá því að FSA hafi ekkert gert til þess að koma í veg fyrir stofnun Edge reikninganna í apríl 2008, einungis átta mánuðum áður en bankinn hrundi, vegna þess að talið væri að með stofnun reikninganna væri hægt að bæta lausafjárstöðu Kaupþings. Blaðið hefur eftir hátt settum yfirmanni úr FSA að þar á bæ hafi menn haft áhyggjur af lausafjárstöðu Kaupþings allt frá því fyrir jól árið 2007.

Telegraph segir að Kaupþing Singer & Friedlander, sem var breskt dótturfélag Kaupþings, hafi verið mjög nærri því að bjargast úr efnahagshruninu. Hins vegar hafi bresk yfirvöld neyðst til að frysta eignir Kaupþings í aðdraganda hruns bankans vegna ótta um að peningar yrðu millifærðir frá Bretlandi til Íslands.

Shearer krafðist rannsóknar á bankanum

Telegraph segir að talsmenn FSA vilji ekki tjá sig um það hvort stofnunin rannsaki starfsemi Kaupþings. Tony Shearer, sem var bankastjóri Singer & Friedlander áður en Kaupþing tók bankann yfir, hafi skrifað FSA bréf og farið fram á að starfsemin yrði rannsökuð.

„Vegna allra þeirra sem töpuðu fjármunum verðum við að vita hvað gerðist á milli þess sem bankinn var tekinn yfir og hann hrundi," sagði Shearer í samtali við Telegraph. „FSA er að hluta til ábyrgt vegna þess að þetta gerðist allt á vaktinni þeirra," sagði hann.

Talsmenn FSA fullyrða hins vegar að þeir hafi ekkert getað gert til að koma í veg fyrir kaup Kaupþings á Singer & Friedlander árið 2005 þrátt fyrir efasemdir um kaupandann.