Ísland hrapar niður lífskjaralista SÞ

Ísland hefur hrapað niður lífskjaralista Sameinuðu Þjóðanna (SÞ) í ár og vermir nú 17. sæti listans. Í fyrra var Ísland í 3. sæti listans og árið 2007 var Ísland á toppi hans.

Það er þróunarverkefni SÞ (UNDP) sem tekur saman þennan lista á hverju ári. Meðal þess sem mælt er á listanum eru hagstærðir, þjóðartekjur, lífslíkur, heilbrigði, menntun og fleira.

Í fréttum í norskum fjölmiðlum kemur fram að Noregur er nú á toppi listans eins og í fyrra sem þýðir að engin þjóð í heiminum hefur það betra en Norðmenn í ár.

Athygli vekur að af Norðurlöndunum er Danmörk enn neðar á listanum en Ísland eða í 19. sæti.

Í næstu sætum á eftir Noregi koma svo Ástralía, Nýja Sjáland, Bandaríkin og Írland. Í botnsætum listans eru svo Niger, Lýðveldið Kongó og Zimbawe.

Nokkrar þjóðir koma ekki til álita á listanum vegna skorts á upplýsingum en þetta á m.a. við um Kúbu, Norður-Kóreu og Íran.