Birgir Leifur lék á 58 höggum á Akranesi!

Birgir Leifur Hafþórsson, atvinnukylfingur úr Golfklúbbi Kópavogs og Garðabæjar, fór hamförum á Garðavelli í dag og lék völlinn á 58 höggum eða 14 höggum undir pari vallarins.

„Þetta var ótrúlegur hringur og það gekk allt upp. Ég er búinn að stefna að því að leika undir 60 höggum frá því að ég var lítill drengur og magnað að ná þessum áfanga. Það er ótrúlegt að leika fjórtán höggum undir pari," segir Birgir Leifur sem þar með bætti vallarmet Heiðars Davíðs Bragasonar frá árinu 2007 um heil sjö högg en óvíst er hvort hann fáið vallarmetið staðfest.

Fáheyrt er að kylfingar leiki á víðlíka skori hér á Íslandi og er jafnvel um besta hring á Íslandi að ræða. Það þykir býsna fréttnæmt þegar kylfingar erlendis ná að rjúfa 60 högga múrinn. Þetta er besti hringur Birgis á ferlinum en hann notaði 25 pútt á hringum og fékk engan skolla.