Deutsche Bank tilkynnti ESB um yfirtökuna á Actavis

Actavis samheitalyfjafyrirtækið lýtur fullkomnum yfirráðum Deutsche Bank, ef eitthvað er að marka tilkynningu Deutsche Bank til framkvæmdastjórnar Evrópusambandsins. Björgólfur Thor taldi fyrir réttu ári að Actavis væri yfirskuldsett og gæti ekki geta staðið undir greiðslum á lánum. Þá taldi hann eigið fé uppurið. Þetta kemur fram í tölvupósti sem hann sendi samstarfsmönnum sínum.

Fréttastofa hefur undir höndum tölvupóst sem Björgólfur Thor Björgólfsson fjárfestir sendi nánum samstarfsmönnum sínum hjá Novator í september árið 2009, eða fyrir réttu ári síðan. Í bréfinu ræðir Björgólfur Thor um framtíð Actavis og segir síðan orðrétt: : „Eins og staðan er í dag þá er fyrirtækið (Actavis innsk.blm) yfir skuldsett og getur ekki staðið undir greiðslum á þeim lánum sem hvíla á félaginu. Þá er einnig ljóst að fjárhæð skulda er verulega umfram verðmæti félagsins og því ekkert eigið fé er eftir í strúktúrnum." Þarna er með öðrum orðum stærsti hluthafinn í Actavis fyrir ári síðan að lýsa því yfir að fyrirtækið sé í mjög slæmri fjárhagslegri stöðu.

Eins og komið hefur fram í fjölmiðlum hefur Björgólfur Thor gert samkomulag við helstu lánardrottna sína um uppgjör skulda, en samkomulagið hleypur á mörg hundruð blaðsíðum og er þungamiðja þess væntingar um framtíðarsöluvirði Actavis.

Það sem vekur hins vegar sérstaka athygli er Actavis virðist lúta fullkomnum yfirráðum Deutsche Bank. Að minnsta kosti ef eitthvað er að marka þessa tilkynningu (sjá viðhengi og myndskeið með frétt) sem Deutsche Bank sendi framkvæmdastjórn Evrópusambandsins hinn 18. ágúst síðastliðinn og birt er í opinberu riti Evrópusambandsins eða The Official Journal of The European Union. Þarna er Deutsche Bank að óska eftir samþykki framkvæmdastjórnarinnar, vegna ákvæða tilskipunar um samruna, um að fyrirtækið hafi tekið Actavis yfir í heild sinni og vill samþykki vegna samkeppnisréttarlegra sjónarmiða. Þetta er athyglisvert því þetta þýðir í raun að Deutsche Bank stjórni og eigi Actavis, en eins og fréttastofa hefur greint frá hefur Björgólfur Thor gert samkomulag við lánardrottna sína sem færir honum heimild til eignast umtalsverðan hlut í söluandvirði Actavis umfram fimm milljarða evra. Vinna vegna samkomulagsins var leidd af Deutsche Bank og var það Stephen Pitts á skrifstofu bankans í Lundúnum sem stýrði henni.

Ragnhildur Sverrisdóttir, talsmaður Björgólfs, segir að þessi tilkynning Deutsche Bank til framkvæmdastjórnar Evrópusambandsins snúi að fjárhagslegri endurskipulagningu á Actavis. Um sé að ræða „tæknilegt atriði" þar sem Deutsche Bank sé að leggja fram til samþykktar samning um fjárhagslega endurskipulagningu.

Það er ekki í samræmi við þessa frétt Reuters-fréttastofunnar, á vef Reuters um samruna- og yfirtökur, en þarna er greint frá því að Deutsche Bank hafi tekið Actavis yfir.