Fljúga í Fokker frá Reykjavík til Noregs

Jón Hákon Halldórsson skrifar 8. október 2010 14:01

Flugfélag Íslands ætlar að fljúga til Noregs um jólin. Mynd/ Valgarður.

Flugfélag Íslands mun fljúga milli Íslands og Noregs um næstu jól og áramót með Fokker vélum. Flogið verður frá Reykjavíkurflugvelli til Stavanger, Bergen og Þrándheims, samkvæmt upplýsingum frá Flugfélaginu. Hingað til hefur Icelandair séð um flug til Noregs og hefur þá verið flogið í Boeing þotum. Iceland Express hefur líka verið með þotuflug til Noregs.

Flugtíminn á Fokkernum til Bergen er áætlaður 3 klukkustundir og 15 mínútur en 3 klukkustundir og 25 mínútur til Stavanger og Þrándheims. Verð farmiða aðra leiðina verður á bilinu 28-45 þúsund krónur, að sögn Inga Þórs Guðmundssonar, forstöðumanns sölu- og markaðssviðs Flugfélagsins. Markhópinn segir hann fyrst og fremst Íslendinga búsetta í Noregi og fjölskyldur þeirra.

Ferðir Flugfélags Íslands verða sem hér segir:

Flogið verður til Stavanger 20. og 28. desember og 4. janúar.

Flogið verður til Þrándheims 21. og 27. desember og 3. janúar

Flogið verður til Bergen 21. og 27. desember og 3. janúar

Salan er þegar hafin á heimsíðu Flugfélags Íslands.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.