Viðskipti erlent

Brynvörðum peningaflutningabíl breytt í lúxuslimmósínu

Neyðin kennir naktri konu að spinna segir máltækið og það á vel við um eigendur fyrirtækis í Dallas Texas sem sérhæfir sig í flutningum á peningum milli staða í brynvörðum bílum. Viðskiptin hafa dalað mikið í kreppunni og því greip fyrirtækið til þess ráð að breyta bílum sínum í lúxuslimmósínur fyrir hina frægu og ríku.

Samkvæmt frétt um málið á börsen.dk heitir fyrirtækið núna The Armored Limousine Service og viðskiptin blómstra. Þessir brynvörðu bílar eru innréttaðir eins og myndband frá MTV stöðinni með leðuráklæðum og gullhandföngum ásamt blikkljósum og stillanlegri súlu fyrir nektardansmeyjar.

Einnig fylgir með hinn sjálfsagði kampavínsbar, nettenginar og tölvuspilaskjáir. Þar að auki eru þessar 100% skotheldu limmósínur með innbyggða byssurekka og á hliðum þeirra eru sérstök göt til að skjóta gegnum. Það er öruggt að viðskiptavinir fyrirtækisins komast óskaddaðir á rauða dregilinn.







Mest lesið


Fleiri fréttir

Sjá meira


×

Mest lesið