Vonar að niðurstaðan gagnist í samningum

Hreiðar Már Sigurðsson vonar að niðurstaðan úr rannsókn Breska fjármálaeftirlitsins (FSA) á starfsemi Kaupþings Singer & Friedlander í aðdraganda hrunsins geti nýst í samningaviðræðum stjórnvalda um uppgjör hrunsins.

Þetta kemur fram í bréfi sem Hreiðar Már Sigurðsson hefur sent til ráðamanna hérlendis í tilefni þess að rannsókninni er lokið. Bréfið var póstlagt á þriðjudag í Lúxemborg og er stílað á forsætisráðherra, fjármálaráðherra, efnahags- og viðskiptaráðherra, forstjóra Fjármálaeftirlitsins og sérstakan saksóknara.

Í bréfinu nefnir Hreiðar að ákvarðanir breskra stjórnvalda um að bjarga ekki bankanum frá hruni í október 2008 hafi haft „bein og mikil áhrif á þróun mála hér á landi." Haldið hafi verið fram, meðal annars af Gordon Brown í samtali við Geir H. Haarde, að miklir fjármunir, 500 til 1.500 milljónir punda, hefðu verið fluttir úr bankanum til Íslands dagana fyrir hrun.

Hreiðar segir þá spurningu áleitna hvort bankinn hafi þurft að fara í þrot og af hverju hann fékk ekki aðstoð breska ríkisins. Rannsókn FSA leiði í ljós að ástæðuna sé ekki að finna í lögbrotum eða misferli stjórnenda bankans. Von hans sé því að sú niðurstaða geti nýst stjórnvöldum í samningaviðræðum um uppgjör hrunsins.

Hreiðar Már gagnrýnir íslenska Fjármálaeftirlitið (FME) harðlega í bréfi sínu og furðar sig á því að enginn starfsmaður þess hafi rætt við hann svo mikið sem einu sinni frá falli Kaupþings. Til samanburðar hafi FSA tekið fjölda skýrslna af öllum helstu stjórnendum Kaupþings Singer & Friedlander. Það gefi ástæðu til að ætla að niðurstöður þess séu vel ígrundaðar og faglegar, á meðan svo virðist sem ályktanir FME um meinta glæpi stjórnenda Kaupþings séu alrangar og að eftirlitið verði aldrei trúverðugt.

Þá hafi ekkert lekið út um rannsókn FSA, ólíkt því sem verið hefur hjá FME. Til dæmis hafi einungis liðið nokkrir klukkutímar frá því að FME fékk lánabók Kaupþings og FIH í hendur á rafrænu formi þar til hún var komin á vefinn Wikileaks.

Hreiðar segist vona að þessi ábending hans veki íslensk stjórnvöld til umhugsunar og aðgerða í þessum efnum.

Kaupþing er þó enn til rannsóknar á Bretlandseyjum. Serious Fraud Office, sem rannsakar glæpi í bankakerfinu, skoðar enn þátt Kaupþings í meintri svika-fléttu með hluti í íþróttavörukeðjunni JJB Sports, auk þess sem starfsmenn embættisins hafa verið sérstökum saksóknara til aðstoðar við hans rannsóknir.

stigur@frettabladid.is