Pálmi Haraldsson er fluttur til Lúxemborgar

Pálmi Haraldsson flutti lögheimili sitt til Lúxemborgar þann 24. ágúst síðastliðinn. Þetta kemur fram í eiðsvarinni yfirlýsingu Pálma sem send var dómstólum í New York þann 4. nóvember í síðustu viku.

Fjallað er um málið á vefsíðu Viðskiptablaðsins. Þar kemur fram að Pálmi segir ennfremur í yfirlýsingunni að hann hafi heimsótt Bretland í skamman tíma á árunum 2009 og 2010 í viðskiptaerindum. Síðast hafi hann verið í Bretlandi þann 6. júlí 2010.

Þá segir Pálmi að hann hafi aldrei starfað eða verið búsettur í New York.

Pálmi er einn þeirra sjö sem slitastjórn Glitnis hefur stefnt fyrir dómstóli í New York fyrir að hafa rænt bankann innan frá.

Í lok síðasta árs flutti Pálmi lögheimili sitt til Bretlands en hefur nú, samkvæmt yfirlýsingunni, fært það til Lúxemborgar.