Pato ætlar ekki að yfirgefa Milan

Brasilíumaðurinn ungi, Alexandre Pato, fór á kostum gegn Real Madrid í Meistaradeildinni og skoraði tvö mörk í glæstum sigri AC Milan.

„Ég sagði við sjálfan mig: Ale, þú verður að setja boltann í markið og ég gerði það. Ég vil skrá nafn mitt í sögubækurnar og tvö mörk gegn Real Madrid er aðeins upphafið að þeirri sögu," sagði þessi tvítugi framherji.

„Til að verða farsæll þarf ég að klára mikilvægu leikina. Ég sagði við nokkra vini mína að þetta yrði minn dagur og ég gæti bara ekki klikkað á Bernabeau. Þetta var bara of mikilvægur leikur."

Eftir svona frammistöðu fara gróusögurnar í gang en Pato hefur áður verið orðaður við Chelsea og núna er strax byrjað að orða hann við Real Madrid.

„Ég veit ekkert um það. Ég er nýbúinn að endurnýja samninginn minn við Milan og ég vil vera þar áfram," sagði Pato.