Sparnaður kvartar undan Nýja Landsbanka og KB-ráðgjöf

Forsvarsmaður Sparnaðar ehf segir að sér hafi borist í hendur skjöl og vitneskja um að Nýi Landsbankinn beiti gróflegum rangfærslum og fölsun á gögnum í þeim tilgangi að ná til sín langtímasparnaði viðskiptavina Bayern Líf, sem er umboðsaðili þýsku tryggingarsamsteypunnar Versicherungs Kammer Bayern á Norðurlöndum. Af þessum sökum hefur Sparnaður sent kvörtun til Neytendastofu vegna ólögmætra viðskiptahátta Nýja Landsbankans.

„Þetta er þeim mun alvarlegri blekkingar hjá Nýja Landsbankanum þegar haft er í huga að þeir eru að hvetja sparendur til þess að segja upp viðbótarlífeyrissparnaði hjá Bayern Líf, sem ábyrgist innistæður og lágmarks ávöxtun sparnaðarins með útgáfu tryggingaskírteinis. Um leið er Landsbankinn að benda fólki á verðtryggða reikninga sem valkost á tímum þegar verðhjöðnun er í gangi og verðtryggðar innistæður rýrna," segir Ingólfur Ingólfsson hjá Sparnaði ehf í tilkynningu sem hann sendi vegna málsins.

Ingólfur hefur einnig sent kvörtun vegna KB-ráðgjafar, sem er söluaðili og dótturfélag Nýja Kaupþings Banka. Ingólfur segir að KB-ráðgjöf hafi einnig orðið uppvís að rangfærslum og blekkingum í tilraun sinni til þess að ná í lífeyrissparnað hjá viðskiptavinum Bayern Líf.

„Það er vissulega lífsspursmál fyrir íslensku bankana að fá til sín sparnað almennings þar sem búið er að loka fyrir erlendar lántökur til þeirra. En það er ólíðandi, bæði fyrir fólkið í landinu og samkeppnisaðila bankanna, að þeir beiti blekkingum og rangfærslum til þess að ná til sín sparnaði fólks. Sá tími ætti að vera liðinn í bankaviðskiptum í dag. Það væri nær að íslenskir vörsluaðilar lífeyrissparnaðar, hvort sem það eru bankar eða lífeyrissjóðir, tækju upp fjárfestingarstefnu þýsku sparisjóðanna við varðveislu langtímasparnaðar, ekki síst í ljósi gríðarlegs taps á fjárfestingum sínum og jafnvel varanlegra skerðinga á lífeyrissréttindum sjóðfélaga sinna," segir Ingólfur.

Ingólfur segir að mál NBI og KB-Ráðgjafar hafi verið send til Neytendastofu til meðferðar og þess vænst að Neytendastofa leggi stjórnvaldssektir á fyrirtækin í samræmi við alvarleika brotanna. Þá hafi ráðherra bankamála verið upplýstur um þessa ólögmætu og siðlausu viðskiptahætti Nýja Landsbankans og KB-Ráðgjafar.