Nordea í dómsmáli vegna kaupa í íslensku bönkunum

Norræni stórbankinn Nordea er nú í miklum vandræðum en finnskir fjárfestar hafa ákært bankinn um að hafa tælt sig til að fjárfesta í skuldabréfasjóðnum Mermaid. Tæplega 25 milljarðar kr. eru horfnar og eftir standa 1.400 til 1.500 reiðir Finnar. Nordea fjárfesti í íslensku bönkunum þremur auk þess að fjárfesta í undirmálslánum vestan hafs í gegnum þennan sjóð.

Í umfjöllun um málið á vefsíðunni di.se segir að fjallað hafi verið um málið í sjónvarpsþætti í finnska sjónvarpinu. Þar var meðal annars rætt við Finna sem höfðu sett sparifé sitt í Mermaid sjóðinn og tapað því öllu. Hinsvegar hafi sölumenn Nordea talið þeim trú um að um örugga fjárfestingu væru að ræða.

Nordea hóf að markaðssetja Mermaid fyrir þremur árum síðan og var sjóðnum beint að efnuðum einstaklingum. Í ljós hefur komið að fé þessa fólk var notað til kaupa á skuldabréfum í Glitni, Kaupþingi og Landsbankanum og fasteignasjóðunum Freddie Mac og Fannie Mae í Bandaríkjunum.

Þegar fjármálakreppan skall á í fyrra glataðist allt fé sjóðsins og í dag er ekki til króna af sparifé fyrrgreindra Finna.

Í finnska sjónvarpsþættinum var fjármálaeftirlit landsins harðlega gagnrýnt fyrir að hafa ekki gripið inn í málið fyrr og stöðvað starfsemi Mermaid. Þess er jafnframt getið að norska fjármálaeftirlitið bannaði starfsemi Mermaid í Noregi þegar reynt var að markaðssetja sjóðinn þar í landi.

Fyrsta dómsmál finnsku fjárfestanna gegn Nordea vegna Mermaid hefjast bráðlega. Alls hafa yfir 20 mál verið skráð hjá skuldabréfaeftirlitinu í Helsingfors þar sem krafist er endurgreiðslu frá Nordea sökum þessa sjóðs.