Heildarútlán Íbúðalánasjóðs dragast saman um 7%

Alls námu heildarútlán Íbúðalánasjóðs rúmlega 2,4 milljörðum króna í júlí. Þar af voru rúmir 1,7 milljarðar vegna almennra lána og tæpar 700 milljónir vegna leiguíbúðalána. Heildarútlán sjóðsins drógust því saman um rúm 6,9 % frá fyrri mánuði.

Meðalútlán almennra lána voru um 10,1 milljón króna í júlí sem er um 5% lækkun frá fyrri mánuði.

Alls lánaði Íbúðalánasjóður um 8 milljarða króna á öðrum ársfjórðungi sem er um 15% minna en á fyrsta fjórðungi ársins. Heildarútlán fyrstu sex mánuði ársins voru því um 17,4 milljarðar en það eru um 30% minni útlán en á fyrstu sex mánuðum ársins 2008.

Þann 17. júlí birti Íbúðalánasjóður endurskoðaða áætlun um útgáfu, útboð íbúðabréfa og greiðslur Íbúðalánasjóðs fyrir árið 2009.

Sjóðurinn áætlar að gefa út íbúðabréf að nafnverði 28-32 milljarða króna, sem er lækkun um 5-6 milljarða frá fyrri tölum. Áætlað er að ný útlán sjóðsins verði 36-40 milljarðar króna á þessu ári sem er lækkun um 5-7 milljarða frá fyrri áætlun. Íbúðalánasjóður áætlar að greiða lánardrottnum sínum 60-64 milljarða króna á árinu 2009.

Umsóknum vegna greiðsluerfiðleika fækkar

Á öðrum ársfjórðungi bárust 885 umsóknir vegna greiðsluerfiðleika sem eru um 6% færri umsóknir en á fyrsta ársfjórðungi. Á fyrstu sex mánuðum ársins hafa því borist 1827 umsóknir sem er veruleg aukning frá sama tímabili ársins 2008. Úrræði vegna greiðsluvanda eru samningar, skuldbreyting vanskila, frestun á greiðslum, lenging lána og greiðslujöfnun. Frá því sjóðurinn fór að bjóða upp á greiðslujöfnun fasteignaveðlána hafa verið afgreiddar 387 umsóknir.

Heildarvelta íbúðabréfa í júlí nam rúmum 122 milljörðum sem er 62% meiri velta en í fyrri mánuði. Heildarvelta bréfanna nemur 530 milljörðum það sem af er árinu 2009.