Gjaldþrotakóngur Dana komst í þrot 97 sinnum á 3 árum

Tíu mestu gjaldþrotakóngar/kennitöluflakkarar Danmerkur eru með dauða 271 fyrirtækja/félaga á samviskunni. Einn þeirra hefur 97 sinnum lýst yfir gjaldþroti á síðustu þremur árum.

Þetta kemur fram í nýrri rannsókn Green Erhvervsinformation sem náði til 42 þúsund einstaklinga og 59.000 lokana fyrirtækja í Danmörku. Hvað fyrrgreindan gjaldþrotakóng varðar var stór hluti af gjaldþrotunum hans í félögum í ferðamannageiranum.

Í umfjöllun danskra fjölmiðla um málið í morgun segir að karlar séu ekki þeir einu sem eru stórtækir í gjaldþrotum og kennitöluflakki. Í topp tíu hópnum sé ein kona sem hefur 25 gjaldþrot á bakinu á einu ári.

„Það eru hinir fáu sem eyðileggja fyrir hinum mörgu. Þegar maður sér sama nafnið óteljandi sinnum á listanum yfir lokanir félaga verður maður að spyrja sjálfan sig hvort ekki skorti löggjöf á þessu sviði," segir Bo Rasmussen forstjóri Green Erhvervsinformation í tilkynningu um rannsóknina.