Fyrsta leik af 36 lokið

Í morgun fór fram leikur Norður-Kóreu og Sameinuðu arabísku furstadæmanna í undankeppni HM 2010 í Asíu en það var sá fyrsti af 36 slíkum leikjum sem fara fram í fimm heimsálfum í dag.

Norður-Kórea vann leikinn, 2-0, með mörkum Pak Nam-Chol á 51. mínútu og Mun In-Guk í uppbótartíma leiksins.

Þar með tryggði Norður-Kórea sér efsta sæti B-riðils í undankeppninni í Asíu og er tveimur stigum á undan grönnum sínum í Suður-Kóreu sem eiga leik til góða. Þeir eru reyndar í fríi í dag en hinn leikur riðilsins er viðureign Íran og Sádí-Arabíu.

Tvö efstu liðin úr bæði A- og B-riðli komast áfram á HM í Suður-Afríku á næsta ári og verður að teljast líklegt miðað við núverandi stöðu liðanna að það verði Norður- og Suður-Kórea.

Norður-Kórea er nú að taka þátt í undankeppni HM í fyrsta sinn síðan 1994. Norður-Kóreumenn hafa einu sinni komist í úrslitakeppni HM og þá slógu þeir í gegn. Það var í keppninni sem fór fram í Englandi árið 1966 og komst liðið alla leið í fjórðungsúrslit. Unnu þeir frækinn sigur á Ítalíu sem sátu eftir í riðlakeppninni með sárt ennið.

Þeir urðu svo að sætta sig við 5-3 tap fyrir Portúgal í fjórðungsúrslitunum þar sem sjálfur Eusebio skoraði fjögur markanna.

Alls fara 20 leikir fram í undankeppni HM í Evrópu í dag. Ísland er þó ekki að keppa enda í eina riðlinum í Evrópu sem ekki telur sex lið - heldur fimm. Það er því oftar frí hjá liðum þess riðils en annarra í álfunni. Aðeins einn leikur fer fram í íslenska riðlinum er Holland tekur á móti Skotlandi.

Þrír leikir fara fram í Suður-Ameríku, sex í Afríku, fjórir í Asíu og þrír í Norður- og Mið-Ameríku í dag.

Aðeins eitt álfusamband Alþjóða knattspyrnusambandsins, FIFA, hefur klárað sína undankeppni. Það er Knattspyrnusamband Eyjaálfu. Nýja-Sjáland bar sigur úr býtum þar og mætir liðinu sem verður í fimmta sæti í undankeppni Norður- og Mið-Ameríku bæði heima og að heiman um eitt laust sæti í Suður-Afríku. Þeir leikir fara fram í nóvember næstkomandi.

Þess má geta að Ástralía keppir nú í fyrsta sinn í undankeppni HM í Asíu þó landið tilheyri vissulega Eyjaálfu. Þar keppir liðið í A-riðli og er enn taplaust eftir fjóra leiki og með tveggja stiga forystu á Japan.

Japan getur reyndar komist á topp riðilsins með sigri á Barein í dag en Ástralir eru í fríi þennan laugardaginn.

Hægt er að fylgjast með öllum leikjum dagsins á heimasíðu FIFA.