Rekstur Eik gekk vel í fyrra þrátt fyrir erfið skilyrði

Rekstur Eik fasteignafélags gekk mjög vel á síðasta ári þrátt fyrir mjög erfið skilyrði og mikil umbrot í íslensku fjármálaumhverfi. Tap af rekstrinum nam rúmlega 36 milljónum kr.

Eik fasteignafélag hf. birti í dag ársuppgjör fyrir árið 2008 að loknum stjórnarfundi þar sem reikningar félagsins voru samþykktir. Gríðarleg veiking íslensku krónunnar skaðaði jafnt fyrirtæki sem einstaklinga og í kjölfar hennar fylgdi tæplega 20% verðbólga. Í kjölfarið féll verð á atvinnuhúsnæði og seljanleiki þess er mjög lítill.

Í tilkynningu segir að miðað við ofangreint verður ekki annað sagt um stöðu Eikar fasteignafélags en að hún sé góð. Félagið stýrði gjaldmiðlaáhættu sinni vel og hefur því ekki lent í vandræðum vegna falls krónunnar.

Þeir leigusamningar sem ekki eru tengdir gjaldmiðlum eru nær undantekningarlaust annaðhvort verðtryggðir með vísitölu neysluverðs eða byggingarvísitölu. Áhrif verðbólgu eru því mjög takmörkuð.

Í þessu erfiða árferði varð hagnaður félagsins neikvæður um 31,6 milljónir króna og arðsemi eigin fjár var neikvæð um 1,25%, sem verður að teljast vel ásættanlegt í gjörningaveðri því sem geisar í íslensku efnahagslífi. Veltan á árinu jókst um 24% og var 1,8 milljarðar króna.

„Eftir hið viðburðaríka ár 2008 með yfirtöku ríkisins á þremur stærstu viðskiptabönkunum, gríðarlegri veikingu krónunnar og verðbólgu upp á tæp 20% er ekki annað hægt að segja en að við séum mjög sátt við útkomuna á síðasta ári," segir Garðar Hannes Friðjónsson, forstjóri Eikar fasteignafélags hf.

„Staða félagsins er sterk og við höfum lagt áherslu á að verja félagið gagnvart þeim aðstæðum sem eru á fjármálamarkaði. Félagið er með mikið eigið fé og sterka sjóðstöðu en engu síður er ljóst að eitt af helstu verkefnum félagsins á árinu 2009 verður endurfjármögnun. Rúmlega 500 milljóna króna eingreiðslulán er á gjalddaga um mitt árið og munu reglubundnar afborganir nema svipaðri fjárhæð.

Þar sem virðisútleiguhlutfallið hefur lækkað og leigutekjur félagsins hafa dregist saman er ljóst að eingreiðslulánið þarf að endurfjármagna að fullu og hluta af reglubundnum afborgunum. Af framansögðu er ég mjög bjartsýnn á framtíð félagsins því að rekstur þess hefur gengið vonum framar við mjög erfiðar aðstæður."