Almenni lífeyrissjóðurinn hefur sjálfstæðan rekstur

Almenni lífeyrissjóðurinn mun hefja sjálfstæðan rekstur þann 1. maí 2009 en sjóðurinn var áður með rekstrarsamning við Íslandsbanka hf. Almenni lífeyrissjóðurinn er fimmti stærsti lífeyrissjóður landsins, að fram kemur í tilkynningu.

Stjórn lífeyrissjóðsins tók þá ákvörðun í kjölfar áfalla á fjármálamarkaði að yfirfara rekstrarfyrirkomulag sjóðsins og skoða kosti þess að hefja sjálfstæðan rekstur, en sjóðurinn hefur átt samstarf við Íslandsbanka í nær tvo áratugi. Stjórnin telur að sjóðurinn hafi nú náð þeirri stærð að eðlilegt sé að stíga þetta skref. Markmiðið með þessari breytingu er m.a. að styrkja Almenna lífeyrissjóðinn sem sjálfstæðan lífeyrissjóð. Sjóðurinn stefnir að því að veita sjóðfélögum áfram úrvals þjónustu og tryggja þeim góðan lífeyri.

,,Stjórn Almenna lífeyrissjóðsins telur það rétt skref að Almenni lífeyrissjóðurinn hefji nú sjálfstæðan rekstur og byggi upp sjálfstæða eignastýringu. Við höfum átt mjög gott samstarf við Íslandsbanka og náð með stuðningi bankans að byggja upp sterkan lífeyrissjóð sem veitir á ýmsum sviðum meiri upplýsingar og þjónustu en aðrir lífeyrissjóðir. Nú hefur sjóðurinn náð þeirri stærð að eðlilegt er að hann yfirtaki reksturinn til að efla sjálfstæði hans,” er haft eftir Páli Pálssyni formanni stjórnar Almenna lífeyrissjóðsins.