Starfsmenn JP Morgan fá háar bónusgreiðslur

Laun starfsmanna JPMorgan bankans í Bandaríkjunum nálgast nú þær upphæðir sem tíðkuðust fyrir lánsfjárkrísuna. Starfsmönnunum er heitið háum bónusgreiðslum fyrir vel unnin störf. Eins og Vísir greindi frá í gær, skilaði JPMorgan mjög góðri afkomu á öðrum ársfjórðungi þessa árs eða 2,7 milljörðum dala sem jafngildir um 343 milljörðum íslenskra króna.

Fréttirnar af bónusgreiðslum starfsmanna, samhliða miklum hagnaði bankans, koma einungis tveimur dögum eftir að Goldman Sachs tilkynnti um verulegar bónusgreiðslur til starfsmanna sinna í ljósi góðrar afkomu á öðrum ársfjórðungi.

JPMorgan greiðir 229.255 starfsmönnum sínum 14,5 milljarða dala í laun á fyrstu sex mánuðum ársins. Það jafngildir rúmum 63 þúsund dölum á haus eða rúmum átta milljónum að meðaltali á hvern einasta starfsmann. Starfsmenn bankans á fjárfestingabankasviði fá sex milljarða af þeirri upphæð, að meðaltali nemur sú fjárhæð um þrjátíu milljónum króna á hvern starfsmann fyrir sex mánaða vinnu.

Meðaltal bónusgreiðslna JPMorgan er þó töluvert lægra hjá en hjá Goldman Sachs sem greiðir 66% hærri bónusgreiðslur til sinna starfsmanna.

Fjárfestingabankasvið JPMorgan skilaði 1,5 milljarða dala hagnaði og námu þóknunartekjur alls 2,2 milljörðum dala sem eru hæstu þóknunartekjur sem litið hafa dagsins ljós í bankageiranum á einum ársfjórðungi.

Mikill kostnaður á einstaklingssviði bankans dró hins vegar úr annars frábærri afkomu.

Bank of America og Citigroup, sem báðir hafa mikla markaðshlutdeild á einstaklingssviðinu í Bandaríkjunum, skila hálfsársuppgjöri á morgun og búast greiningaraðilar við því að þeir muni tilkynna um slæma afkomu á einstaklingssviðinu.

Hvort það hefur síðan úrslitaáhrif á afkomu bankanna á hins vegar eftir að koma í ljós.