Ríkið nær samningum við Saga Capital

Samningar hafa nú náðst við Saga Capital vegna 15 milljarða króna skuld sem til komin er vegna endurhverfa viðskipta. Lánið greiðist upp á sjö árum. Ekki er búið að semja við önnur fjármálafyrirtæki en Steingrímur J. Sigfússon, fjármálaráðherra, segir viðræður í gangi. Hann vonast til að endurskipulagningu á fjármálakerfinu verði lokið innan fárra vikna.

Það er ekki hægt að lofa því að vandi allra fjármálafyrirtækja sé leysanlegur segir Steingrímur, og bætir við að viðræður séu nú í gangi um skuldir fjármálafyrirtækja vegna endurhverfa viðskipta við Seðlabanka Íslands.

Endurhverf viðskipti fela í sér að fjármálafyrirtæki kaupa skuldabréf og veðsetja þau svo gegn láni frá Seðlabankanum með samningi um að kaupa skuldabréfin aftur síðar.

Flest smærri fjármálafyrirtæki hér á landi voru í svona viðskiptum við Seðlabankann. Þegar bankarnir féllu var ljóst að skuldabréf útgefin af þeim voru verðlaus og gerði Seðlabankinn í kjölfarið veðkall á fjármálafyrirtækin. Ríkið tók svo viðskiptin yfir og var skuld fjármálafyrirtækja vegna þeirra 270 milljarðar.