Framleiðsluverð lækkar um 8% milli mánaða

Vísitala framleiðsluverðs í febrúar 2009 var 155,5 stig og lækkaði um 8,3% frá janúar.

Í frétt um málið á vefsíðu Hagstofunnar segir að vísitala framleiðsluverðs fyrir sjávarafurðir var 188,9 stig, sem er lækkun um 14,1% frá fyrri mánuði og vísitala fyrir stóriðju var 150,3 stig, lækkaði um 12,7%.

Vísitalan fyrir matvæli lækkaði um 0,3% frá janúar og vísitala fyrir annan iðnað hækkaði um 0,7%.

Vísitala framleiðsluverðs fyrir vörur sem framleiddar voru og seldar innanlands hækkaði um 2,3% milli mánaða en fyrir útfluttar afurðir lækkaði hún um 13,3% .

Frá febrúar 2008 hefur vísitala framleiðsluverðs hækkað um 23,8% og verðvísitala sjávarafurða um 35,5%. Á sama tíma hafa afurðir stóriðju hækkað um 8,0% en matvælaverð um 23,2%.