Þetta verður golfsýning

Við stefnum á að halda flottasta Íslandsmót sem haldið hefur verið. Það er því mikil spenna í loftinu," segir Margeir Vilhjálmsson, mótsstjóri Íslandsmótsins í höggleik sem hefst í dag.

Mótið fer fram á Grafarholtsvelli og fyrstu kylfingarnir verða ræstir út kl. 8 í dag en leiknar verða 72 holur á fjórum dögum og Íslandsmeistarar í karla- og kvennaflokki svo krýndir á sunnudag.

„Hér eru samankomnir allir bestu kylfingar landsins að Birgi Leif Hafþórssyni undanskildum en hann verður að keppa í Svíþjóð. Það er hins vegar enginn skortur á góðum kylfingum hér á landi og sjaldan eins og nú eigum við jafn stóran hóp góðra kylfinga. Þetta verður því golfsýning og það er búið að reyna að setja völlinn upp þannig að hann sé mjög sanngjarn og við í mótsnefndinni búumst við að sjá mjög góð skor. Ég á mér líka þá ósk heitasta að slegin verði vallarmet hér um helgina," segir Margeir.

Margeir segir sérstaka áherslu vera lagða á að fá áhorfendur til þess að fjölmenna í Grafarholtið.

„Hugmyndin er að fólk geti komið og horft á mótið og gert líka eitthvað meira og við verðum með ýmsar uppákomur á meðan mótið stendur yfir. Við verðum með „lítið Íslandsmót" á 6 holu golfvellinum auk þess sem áhorfendum býðst að slá fría bolta í Básum til þess að æfa sig á meðan á keppni stendur á laugardag og sunnudag. Þá munum við koma fyrir risaskjá og einnig sérstökum áhorfendastúkum á vellinum, við teig á 1. holu og við grínið á 18. holu, þannig að fólk geti upplifað stemningu eins og menn sjá á mótum erlendis.

Við vonumst því til þess að fá í kringum 10 þúsund manns í Grafarholtið á þessum fjóru dögum og þó svo að einhverjir telji okkur eflaust vera bilaða þá held ég að þetta sé raunhæft markmið. Það yrði líka frábært fyrir keppendurna ef fólk myndi fjölmenna og mesta viðurkenning sem Íslandsmeistari getur fengið ef þúsundir manna fagna honum þegar hann setur niður lokapúttið," segir Margeir að lokum.