Lánveitingar breskra banka í kastljósinu

Kastljós bæði fjölmiðla og almennings í Bretlandi mun beinast að lánveitingum fjögurra stærstu banka landsins í næstu viku þegar þeir skila hálfsársuppgjöri, að því er breska ríkisútvarpið greinir frá.

Talið er að hægfara endurreisn fjármálamarkaða hafi styrkt bankana nokkuð. Jafnframt er búist við að þeir hafi tapað miklu á bæði húsnæðis- og viðskiptalánum, en skuldsett heimili og fyrirtæki hafa ekki getað staðið í skilum eftir að kreppan skall á.

Þá er nokkur þrýstingur á bankana um að sýna fram á aukin útlán sín til viðskiptalífsins.

Bankarnir Barclays og HSBC eru báðir líklegir til að skila talsverðum hagnaði, Royal Bank of Scotland verður réttu megin við núllið eftir risatap í fyrra, en Lloyds mun líklegast skila nokkru tapi.

Hvorki Barclays né HSBC, sem líklegast skila besta uppgjörinu, þáðu ríkisaðstoð við hrun efnahagskerfisins.