Dynasty stjarnan Joan Collins verslar í lágvöruverslun

Hin 76 ára gamla fyrrum Dynasty stjarna Joan Collins hefur orðið fyrir barðinu á kreppunni eins og flestir aðrir og upplýsir nú að hún sé byrjuð að versla í lágvöruverslunarkeðjunni Primark. Hún hafi ekki lengur efni á að kaupa sér hátískuföt.

„Ég verð að draga úr eyðslunni hjá mér. Ég er hrædd um að þar sé ég í sama báti og allir aðrir," segir hin aldna leikkona í samtali á vefsíðunni ananova.com en sem stendur á hún fjögur heimili.

„Ég fór nýlega í fyrstu ferð mína í Primark og elskaði það," segir Collins. „Ég fann þrjár peysur fyrir samtals 2.200 krónur. Það var frábært."

Collins segir að hún viti ekki um neinn lengur sem hafi efni á að kaupa hátískuföt. „Mig dreymir ekki lengur um að kaupa jakka fyrir rúmlega 600.000 krónur," segir leikkonan.

Hún upplýsir ennfremur um að þegar hún fari eitthvað út með barnabörn sín verði McDonald oft fyrir valinu enda ódýr kostur.