Besta jólagjöfin fyrir alla hjá Stabæk - Veigar kominn heim

Veigar Páll Gunnarsson er kominn heim samkvæmt norskum fjölmiðlum en hann var kynntur sem nýr leikmaður Stabæk á blaðamannafundi í dag eftir að hafa eytt einu og hálfu tímabili í herbúðum franska liðsins Nancy.

„Þegar þetta gengur endanlega í gegn þá teljum við að þetta sé besta hugsanlega jólagjöfin til Daniel Nannskog, Jan Jönsson og allra þeirra sem tengjast og styðja Stabæk," sagði Steen Jensen, stjórnarformaður Stabæk við VG.

Veigar Páll átti frábær tímabil með Stabæk áður en hann fór til Frakklands. Sumarið 2007 var hann með 17 mörk og 15 stoðsendingar og árið eftir var hann með 14 mörk, 10 stoðsendingar og Stabæk var meistari.